Þaðan verður flogið til Mwanza í Tansaníu, næststærstu borgar landsins, sem stendur við Viktoríuvatnið í afar fallegu umhverfi. Í Mwanza verður gist í þrjár nætur á Hótel Tilapia, glæsilegu hóteli sem stendur við vatnið. 

Meðan á dvölinni í Mwanza stendur verður farið í heimsókn til skóla með samstarfsaðilum Vina Kenía og Tansaníu (hakizetu.org) og skoðuð vatnsverkefni sem Vinir Kenía og Tansaníu hafa unnið að og hópurinn er að styðja. Það felst í að byggja vatnstanka sem safna regnvatn og bora holur eftir vatni til drykkjar og hreinlætis (Verkefni sem hafa verið styrkt af utanríkisráðuneyti Íslands). Þá býðst hópnum að taka þátt í upphafi trjáræktarverkefnis sem er skipulagt af Nourish Africa og fjármagnað af þessari ferð. Einnig verður í boði að sigla út í Saanene-þjóðgarðinn sem er á lítilli eyju spölkorn frá Mwanza.

Að lokinni dvöl í Mwanza koma safari-jeppar og sækja hópinn í fjögurra daga safariferð um Ngorongoro- og Serengeti þjóðgarðana. Gist verður í glæsilegum tjöldum með uppábúnum rúmum í “Open camps”  í miðjum Serengeti-þjóðgarðinum.  

Í Serengeti má finna fjölbreytt dýralíf, bæði rándýr og grasbíta, sem hverfist um gríðarlegar hjarðir gnýja og sebradýra sem eru á leið norður um þetta leyti í “The Big Migration”. Stefnan er auðvitað alltaf sett á að sjá „The Big Five“, þ.e. ljón, nashyrning, hlébarða, buffaló og fíl.